“‘अरण्या’च्या निमित्ताने: गडचिरोलीचा सर्जनशील सूर मराठी सिनेमात”
“गडचिरोली ते मराठी चित्रपटसृष्टी: अमोल करंबेचा ‘अरण्या’ बदलतोय जिल्ह्याची ओळख”
राहील खतीब, (विशेष प्रतिनिधी) , गडचिरोली, २६ ऑगस्ट : गडचिरोली, ज्याची ओळख कधीकाळी केवळ दाट जंगलं आणि मागासलेला जिल्हा अशी होती, तिथली तरुण पिढी आता नव्या दिशेने पाऊल टाकत आहे. या जिल्ह्याच्या मातीतून उदयास आलेल्या प्रतिभावंतांनी आपल्या कलेने, सर्जनशीलतेने आणि मेहनतीने गडचिरोलीची प्रतिमा बदलण्यास सुरुवात केली आहे. याच तरुणांपैकी एक नाव आहे – अमोल दिगंबर करंबे.
देसाईगंज-वडसापासून चित्रपटसृष्टीपर्यंतचा प्रवास
गडचिरोलीतील देसाईगंज-वडसासारख्या छोट्या गावातून आलेल्या अमोल करंबे यांनी लहानपणापासूनच कलेची आवड जोपासली. त्यांच्या चिकाटी, सर्जनशील विचार आणि प्रबळ इच्छाशक्तीच्या जोरावर ते आता मराठी चित्रपटसृष्टीत लेखक आणि दिग्दर्शक म्हणून पदार्पण करत आहेत. त्यांचा पहिला मराठी चित्रपट अरण्या लवकरच प्रेक्षकांच्या भेटीला येत आहे. हा चित्रपट केवळ मनोरंजन नाही, तर गडचिरोलीच्या मातीशी आणि आत्म्याशी जोडलेली एक हृदयस्पर्शी कथा आहे.
उपमुख्यमंत्री देवेंद्र फडणवीस यांच्या हस्ते पोस्टरचे अनावरण
नागपुरात नुकतेच अरण्या चित्रपटाचे पहिले पोस्टर महाराष्ट्राचे उपमुख्यमंत्री देवेंद्र फडणवीस यांच्या हस्ते अनावृत करण्यात आले. यावेळी फडणवीस यांनी गडचिरोलीसारख्या जिल्ह्यातून आलेल्या अमोलच्या प्रयत्नांचे कौतुक करत नवोदित प्रतिभांना शुभेच्छा दिल्या. या चित्रपटात लोकप्रिय अभिनेता हार्दिक जोशी मुख्य भूमिकेत आहे, तर हृतिक पाटील, वीणा जगताप, सुरेश विश्वकर्मा, अमोल खापरे आणि ज्येष्ठ अभिनेते विजय निकम यांच्या अभिनयाने कथेला जीव आला आहे.
ग्रामीण मुळांपासून आलेले निर्माते
अरण्या चित्रपटाचे निर्माते आहेत शरद पाटील आणि अंजली पाटील, जे जळगावजवळील एका छोट्या खेड्यातून आलेले जोडपे आहेत. ग्रामीण पार्श्वभूमीतून आलेल्या या दाम्पत्याने दृष्टी, उत्कटता आणि कठोर परिश्रमाने मराठी चित्रपटसृष्टीत पाऊल ठेवले आहे.
अरण्या – गडचिरोलीचा नवा श्वास
अरण्या ही वडील आणि मुलीच्या नात्याची गोष्ट आहे. मुलीच्या भविष्यासाठी वडिलांचा संघर्ष आणि सामाजिक प्रश्नांवर उपस्थित केलेले मोठे प्रश्न प्रेक्षकांना अंतर्मुख करणार आहेत.
गडचिरोलीची नवी ओळख
अमोल करंबेसारखे तरुण सर्जनशील व्यक्तिमत्त्व गडचिरोलीला नवी ओळख देत आहेत. एकेकाळी फक्त मागास जिल्हा म्हणून ओळखला जाणारा हा भाग आता कला, संस्कृती आणि सर्जनशीलतेचा स्रोत बनत आहे. “शेवटचा जिल्हा” हे लेबल आता हळूहळू पुसट होत आहे – गडचिरोली आता भविष्याचा जिल्हा म्हणून उदयास येत आहे.
About The Author
