आरमोरीत 57 कोटींच्या पाणीपुरवठा योजनेचे भव्य भूमिपूजन
“सहपालकमंत्री ॲड. आशिष जयस्वाल यांचे गुणवत्तापूर्ण कामाचे निर्देश”
गडचिरोली, 15 मे : आरमोरी शहरातील पाणी 57 कोटींच्या अमृत योजना 2.0 अंतर्गत पाणीपुरवठा योजनेचे भूमिपूजन आज राज्याचे वित्त व नियोजन, कृषी, मदत व पुनर्वसन, विधि व न्याय, कामगार राज्यमंत्री तथा जिल्ह्याचे सहपालकमंत्री ॲड. आशिष जयस्वाल यांच्या हस्ते उत्साहात संपन्न झाले. या योजनेमुळे 91 किमी पाइपलाइनद्वारे प्रत्येक घरात शुद्ध पाणी पोहोचणार आहे. खासदार नामदेव किरसान, आमदार रामदास मसराम, तहसीलदार उषा चौधरी, अशोक नेते, कृष्णाजी गजबे, महेंद्र ब्राम्हणवाडे, नगरपरिषदेच्या मुख्याधिकारी माधुरी सलामे आणि नागरिक उपस्थित होते.
ॲड. जयस्वाल यांनी काम गुणवत्तापूर्ण आणि वेळेत पूर्ण करण्याचे निर्देश दिले. पाइपलाइनसाठी रस्त्यांची खोदाई केल्यानंतर त्वरित दुरुस्ती करून नागरिकांना त्रास होऊ नये, याची दक्षता घेण्याचे त्यांनी ठेकेदारांना सांगितले. “कामाची गुणवत्ता आणि पारदर्शकतेवर कोणतीही तडजोड खपवून घेतली जाणार नाही,” असे त्यांनी स्पष्ट केले. तसेच, आरमोरीसह जिल्ह्याच्या सर्वांगीण विकासासाठी जनप्रतिनिधी, प्रशासन आणि नागरिकांनी समन्वयाने काम करण्याचे आवाहन केले. “सामान्य माणसाच्या अडचणी सोडवायच्या असतील, तर सर्वांनी एकत्र येऊन प्रयत्न करावेत,” असे ते म्हणाले.
पाण्याच्या बचतीवर भर देत त्यांनी प्रभावी संदेश दिला, “धावणारे पाणी हळू चालवा, चालणारे पाणी थांबवा आणि थांबलेले पाणी जिरवा.” या योजनेतून आरमोरीतील प्रत्येक कुटुंबाला शुद्ध पाणी मिळेल, असा विश्वास त्यांनी व्यक्त केला. योजनेच्या तांत्रिक बाबींवर मुख्याधिकारी माधुरी सलामे यांनी प्रकाश टाकला. 91 किमी पाइपलाइनमुळे शहरातील पाणीटंचाईवर कायमस्वरूपी तोडगा निघेल, असे त्यांनी सांगितले.
खासदार किरसान आणि आमदार मसराम यांनी योजनेचे महत्त्व अधोरेखित केले. “ही योजना वेळेत पूर्ण होण्यासाठी सर्वतोपरी सहकार्य करू,” असे किरसान म्हणाले. मसराम यांनी नागरिकांच्या अपेक्षा पूर्ण करण्यासाठी प्रशासनाने सक्रिय राहावे, असे आवाहन केले. अशोक नेते आणि कृष्णाजी गजबे यांनीही योजनेच्या यशस्वितेसाठी शुभेच्छा दिल्या.
या योजनेच्या भूमिपूजनाने नागरिकांमध्ये उत्साह संचारला आहे. पाणीटंचाईने त्रस्त असलेल्या आरमोरीकरांना आता नियमित पाणीपुरवठ्याची आशा आहे. उपस्थितांनी सहपालकमंत्र्यांच्या पाणी बचतीच्या संदेशाचे स्वागत केले. ही योजना आरमोरीच्या विकासात मैलाचा दगड ठरेल, असा विश्वास व्यक्त होत आहे. प्रशासन, ठेकेदार आणि नागरिकांच्या समन्वयाने हे काम यशस्वी होईल, यात शंका नाही.
About The Author
