तात्पुरते फटाका परवाने आता तालुकास्तरावरच!
जिल्हाधिकाऱ्यांकडून तहसीलदारांना अधिकार; व्यावसायिकांची जिल्हा मुख्यालयाच्या फेऱ्यांतून सुटका
गडचिरोली, ७ ऑक्टोबर : आगामी दिवाळी सणाच्या पार्श्वभूमीवर तात्पुरत्या स्वरूपात फटाका विक्रीचा परवाना घेऊ इच्छिणाऱ्या व्यावसायिकांसाठी जिल्हा प्रशासनाने मोठा दिलासा दिला आहे. आता फटाका विक्रीचा तात्पुरता परवाना मिळवण्यासाठी अर्जदारांना गडचिरोली जिल्हाधिकारी कार्यालयात येण्याची आवश्यकता राहणार नाही. हे अधिकार तालुकास्तरावर सोपविण्यात आले असून, संबंधित तहसीलदार तथा तालुका दंडाधिकाऱ्यांना परवाने निर्गमित करण्यासाठी प्राधिकृत करण्यात आले आहे.
प्रशासकीय विकेंद्रीकरणाचा निर्णय
दिवाळीच्या काळात जिल्ह्यात विविध ठिकाणी मोठ्या प्रमाणावर तात्पुरते फटाका विक्री स्टॉल उभारले जातात. विशेषतः दुर्गम आणि ग्रामीण भागातील व्यावसायिकांना परवान्यासाठी जिल्हा मुख्यालय असलेल्या गडचिरोली येथे वारंवार ये-जा करावी लागत होती. त्यामुळे त्यांचा वेळ, पैसा आणि श्रम वाया जात होते.
अर्जदारांची ही गैरसोय लक्षात घेऊन जिल्हाधिकारी अविश्यांत पंडा यांनी प्रशासकीय विकेंद्रीकरणाचा निर्णय घेतला आहे. त्यानुसार संबंधित तहसीलदारांना त्यांच्या कार्यक्षेत्रात तात्पुरत्या फटाका विक्री परवान्याबाबत आवश्यक कार्यवाही करण्याचे अधिकार देण्यात आले आहेत.
आता तालुका तहसील कार्यालयातच अर्ज करा
फटाका विक्रीचा तात्पुरता परवाना घेऊ इच्छिणाऱ्या स्थानिक अर्जदारांनी आता जिल्हा मुख्यालयात येण्याऐवजी आपल्या संबंधित तालुका तहसील कार्यालयाशी संपर्क साधावा. तेथे रीतसर अर्ज साद करून परवान्यासाठी आवश्यक असलेली पुढील कार्यवाही पूर्ण करता येणार आहे.
दुर्गम भागातील व्यावसायिकांना मोठा दिलासा
जिल्ह्याचा भौगोलिक विस्तार मोठा असून अनेक तालुके दुर्गम आणि ग्रामीण भागात आहेत. त्यामुळे परवाना प्रक्रियेचे तालुकास्तरावर विकेंद्रीकरण झाल्याने स्थानिक व्यावसायिकांना मोठा दिलासा मिळणार आहे. ‘प्रशासन आपल्या दारी’ या भूमिकेला या निर्णयामुळे अधिक बळ मिळणार असल्याचे मानले जात आहे.
दरम्यान, फटाका विक्रीचा व्यवसाय करणाऱ्या इच्छुक अर्जदारांनी आपल्या संबंधित तहसील कार्यालयाशी संपर्क साधून नियम व आवश्यक कागदपत्रांची माहिती घेऊन वेळेत अर्ज करावा, असे आवाहन जिल्हादंडाधिकारी अविश्यांत पंडा यांनी केले आहे.
About The Author
