गडचिरोली SSC निकाल: मुलींनी मारली बाजी, १२ तालुक्यांचा आढावा
गडचिरोली, १३ मे : महाराष्ट्र राज्य माध्यमिक आणि उच्च माध्यमिक शिक्षण मंडळाने (MSBSHSE) आज, मंगळवार, १३ मे २०२५ रोजी फेब्रुवारी-मार्च २०२५ सत्रातील SSC (regular) परीक्षेचे निकाल जाहीर केले. गडचिरोली जिल्ह्यातील १२ तालुक्यांच्या कामगिरीचा आढावा घेताना मुलींनी यंदा उत्कृष्ट कामगिरी करत बाजी मारली आहे. जिल्ह्याचा एकूण उत्तीर्ण टक्का ८२.६७% असून, यामध्ये मुलींची टक्केवारी ८७.६०% तर मुलांची ७८.०२% आहे.
१२ तालुक्यांचा तपशील
1. गडचिरोली तालुका: एकूण १,९८२ विद्यार्थी परीक्षेत उपस्थित होते, त्यापैकी १,७२४ उत्तीर्ण. मुलींची टक्केवारी ९१.५८%, मुलांची ८२.५३%, एकूण टक्केवारी ८६.९८%.
2. सिरोंचा तालुका: सर्वोत्तम कामगिरीसह ८७.४८% टक्केवारी, मुली ९२.४७%, मुलं ८२.६०%.
3. चामोर्शी तालुका: २,६९४विद्यार्थी परीक्षेत उपस्थित, २,२८५ उत्तीर्ण, एकूण टक्केवारी ८४.८१%. मुली ९०.३४%, मुलं ७९.६२%.
4. अहेरी तालुका: १,४१९ उपस्थित, १,२०४ उत्तीर्ण, एकूण टक्केवारी ८४.८४%. मुली ८८.३५%, मुलं ८१.७०%.
5. आरमोरी तालुका: १,४६९ उपस्थित, १,२१६ उत्तीर्ण, एकूण टक्केवारी ८२.७७%. मुली ८७.३८%, मुलं ७८.८६%.
6. देसाईगंज वडसा तालुका: १,२१० उपस्थित, ९९५ उत्तीर्ण, एकूण टक्केवारी ८२.२३%. मुली ८८.०३%, मुलं ७६.८०%.
7. कुरखेडा तालुका: १,२१८ उपस्थित, ९८१ उत्तीर्ण, एकूण टक्केवारी ८०.५४%. मुली ८५.५२%, मुलं ७५.४५%.
8. मुलचेरा तालुका: ७३० उपस्थित, ५८६ उत्तीर्ण, एकूण टक्केवारी ८०.२७%. मुली ८७.६८%, मुलं ७४.०५%.
9. धानोरा तालुका:९६९ उपस्थित, ७७८ उत्तीर्ण, एकूण टक्केवारी ८०.२८%. मुली ८४.८६%, मुलं ७६.००%.
10. भामरागड तालुका: ३१४ उपस्थित, २४९ उत्तीर्ण, एकूण टक्केवारी ७९.२९%. मुली ८२.३१%, मुलं ७६.००%.
11. एटापल्ली तालुका: ६४४ उपस्थित, ४६७ उत्तीर्ण, एकूण टक्केवारी ७२.५१%. मुली ७६.६६%, मुलं ६८.१५%.
12. कोरची तालुका: ४९६ उपस्थित, ३४७ उत्तीर्ण, एकूण टक्केवारी ६९.९५%. मुली ७६.२२%, मुलं ६३.८८%.
जिल्ह्यातील एकूण १४,२१६ नोंदणीकृत विद्यार्थ्यांपैकी १३,८७२ उपस्थित होते. यापैकी ११,४६८ विद्यार्थी (मुलं ५,५७९, मुली ५,८८९) उत्तीर्ण झाले. सर्व तालुक्यांमध्ये मुलींची टक्केवारी मुलांपेक्षा सरासरी ९ ते १५% जास्त आहे. सिरोंचा, गडचिरोली आणि चामोर्शी तालुक्यांमध्ये मुलींची कामगिरी विशेष उल्लेखनीय आहे. दुसरीकडे, एटापल्ली (७२.५१%) आणि कोरची (६९.९५%) तालुक्यांमध्ये टक्केवारी तुलनेने कमी राहिली.
शिक्षण क्षेत्रातील तज्ज्यांनी सांगितले की, मुलींची सातत्यपूर्ण प्रगती ही कौटुंबिक पाठबळ, शैक्षणिक सुविधांमध्ये सुधारणा आणि सरकारच्या विशेष योजनांचा परिणाम आहे. मात्र, मुलांच्या टक्केवारीत सुधारणा करण्यासाठी विशेष प्रयत्नांची गरज आहे, विशेषतः एटापल्ली आणि कोरची सारख्या दुर्गम भागांत, जिथे शैक्षणिक आव्हाने अधिक आहेत.
जिल्हा प्रशासन आणि शिक्षण विभागाने कमी टक्केवारी असलेल्या तालुक्यांमध्ये अभ्यासक्रम सुधारणा, प्रशिक्षित शिक्षकांची नियुक्ती आणि मूल्यांकन प्रक्रियेत पारदर्शकता यावर लक्ष केंद्रित करण्याचे ठरवले आहे. तसेच, पालक आणि शिक्षकांनी मुलांच्या प्रगतीसाठी अधिक सहभाग घ्यावा, असे आवाहन करण्यात आले आहे.
गडचिरोली जिल्ह्याचा एकूण निकाल ८२.६७% टक्केवारीसह समाधानकारक राहिला असून, मुलींच्या यशाने शिक्षण क्षेत्रात नवा आत्मविश्वास निर्माण झाला आहे.
About The Author
