नगर परिषद व नगर पंचायतीच्या कर्मचाऱ्यांना एकस्तर वेतनश्रेणीचा लाभ द्यावा; कर्मचाऱ्यांचे आमदारांना निवेदन
गडचिरोली न्यूज नेटवर्क, ऑगस्ट ०८ , (चामोर्शी) : नक्षलग्रस्त भागातील नगर परिषद व नगर पंचायतीच्या कर्मचाऱ्यांना लागू असलेल्या एकस्तर वेतनश्रेणीचा लाभ देण्यात यावा, अशी मागणी चामोर्शी नगर पंचायतीच्या कर्मचाऱ्यांनी केली आहे.
याबाबत ३ ऑगस्ट रोजी आमदार डॉ. देवराव होळी यांना निवेदन देण्यात आले. त्यात म्हटले आहे की, महाराष्ट्र शासन सामान्य प्रशासन विभाग निर्णय दि. २९ फेब्रुवारी २०२४ नुसार आदिवासी व नक्षलग्रस्त क्षेत्रात कार्यरत असलेल्या कर्मचाऱ्यांना देय असलेल्या एकस्तर पदोन्नती वेतनश्रेणीच्या लाभाबाबत स्पष्टीकरणात्मक सूचना देण्यात आल्या आहेत. जिल्ह्यातील नगर परिषद/नगर पंचायती वगळता इतर सर्व विभागांतील कर्मचाऱ्यांना ही वेतनश्रेणी लागू आहे. त्या अनुषंगाने हा लाभ जिल्ह्यातील नगर परिषदा/नगर पंचायतींमधील कर्मचाऱ्यांना लागू करण्यात यावा, अशी मागणी करण्यात आली. मुख्यमंत्री तसेच उपमुख्यमंत्री व जिल्हाधिकारी यांच्याशी चर्चा करून याबाबत सकारात्मक निर्णय घेण्याचे आ. डॉ. होळी यांनी आश्वासन दिले.
सेवानिवृत्तीच्या लाभात येतो फरक
एकस्तर वेतन श्रेणी लागू न केल्यास सेवानिवृत्तीच्या लाभात बराचसा फरक येतो. कर्मचाऱ्यांवर आर्थिक अन्याय होत असल्याने हा प्रश्न मार्गी लावणे गरजेचे आहे, असे नगर पंचायतीच्या कर्मचाऱ्यांनी निवेदनात म्हटले आहे. दरम्यान यावेळी विस्तृत चर्चा करण्यात आली.
About The Author
