सेवा हक्क कायद्याची दशकपूर्ती: गडचिरोलीत पहिला ‘सेवा हक्क दिन’ उत्साहात साजरा होणार
“जिल्हा प्रशासनाचे विविध उपक्रम, नागरिकांना पारदर्शक सेवांचा लाभ देण्यासाठी कटिबद्ध”
गडचिरोली, २८ एप्रिल : नागरिकांना सुलभ, पारदर्शक आणि समयोचित सेवा प्रदान करणाऱ्या लोकसेवा हक्क कायद्याच्या दशकपूर्तीचा उत्साह गडचिरोली जिल्ह्यात पहिल्या ‘सेवा हक्क दिना’च्या निमित्ताने दिसणार आहे. 28 एप्रिल 2025 रोजी साजऱ्या होणाऱ्या या ऐतिहासिक दिवसासाठी जिल्हा प्रशासनाने व्यापक तयारी केली असून, विविध उपक्रमांद्वारे कायद्याची जागृती आणि प्रभावी अंमलबजावणी करण्याचा संकल्प जिल्हाधिकारी अविश्यांत पंडा यांनी व्यक्त केला आहे.
2015 मध्ये लागू झालेला हा कायदा शासकीय सेवांमध्ये पारदर्शकता आणि उत्तरदायित्व वाढवण्यासाठी मील का ठरला आहे. यंदा दशकपूर्ती आणि सेवा हक्क दिनानिमित्त गडचिरोली जिल्ह्यात ग्रामपंचायत ते जिल्हास्तरापर्यंत विविध उपक्रम राबविले जाणार आहेत.
ग्रामपंचायत स्तरावर जागृती:
जिल्ह्यातील प्रत्येक ग्रामपंचायतीत आदर्श ‘आपले सरकार’ केंद्रांचे उद्घाटन होणार आहे. विशेष ग्रामसभांमध्ये कायद्याच्या ठळक तरतुदींचे वाचन होईल आणि सदस्यांना कायद्याच्या प्रती वितरित केल्या जातील. याशिवाय, सूचना फलक आणि क्यूआर कोडद्वारे अधिसूचित सेवा व शुल्काची माहिती सर्वसामान्यांपर्यंत पोहोचवली जाईल.
जिल्हास्तरीय उपक्रमांचा धडाका:
जिल्हास्तरावर समारंभांचे आयोजन करून कायद्याची वैशिष्ट्ये नागरिकांपर्यंत पोहोचवली जाणार आहेत. उत्कृष्ट कार्य करणाऱ्या अधिकारी-कर्मचाऱ्यांचा सत्कार, ‘सेवा दूत’ योजनेचा शुभारंभ, एसएमएसद्वारे ‘आपले सरकार’ पोर्टलची माहिती, तसेच शाळा-महाविद्यालयांमध्ये जागृतीसाठी स्पर्धा आणि लोककलांद्वारे प्रचार-प्रसार यासारखे नाविन्यपूर्ण उपक्रम राबविले जाणार आहेत.
जिल्हाधिकाऱ्यांचा संदेश
“लोकसेवा हक्क कायदा हा नागरिकांना सशक्त करण्याचा एक महत्त्वाचा टप्पा आहे. या कायद्याच्या जागृतीसाठी आणि प्रभावी अंमलबजावणीसाठी आम्ही कटिबद्ध आहोत. सेवा हक्क दिन हा प्रत्येक नागरिकापर्यंत पारदर्शक सेवांचा लाभ पोहोचवण्याचा संकल्प आहे,” असे जिल्हाधिकारी अविश्यांत पंडा यांनी सांगितले.
“या उपक्रमांमुळे गडचिरोली जिल्ह्यात लोकसेवा हक्क कायद्याची जागृती वाढेल आणि शासकीय यंत्रणा अधिक कार्यक्षम होईल, असा विश्वास प्रशासनाने व्यक्त केला आहे. नागरिकांनी या उपक्रमांत सहभागी होऊन आपले हक्क जाणून घ्यावे, असे आवाहनही करण्यात आले आहे.”
About The Author
