कुरखेड्यात दारूबंदीची थट्टा: मुख्य रस्त्यावर दारूचा बाजार, प्रशासन झोपेत!
“कुरखेड्यात खुलेआम दारूविक्री: ग्रामीण रुग्णालयासमोर मिनी बिअर बार, पोलिसांचे दुर्लक्ष!”
कुरखेडा, गडचिरोली, १३ जून: आदिवासीबहुल गडचिरोली जिल्ह्यात दारूबंदीचा कायदा कागदावरच असल्याचे धक्कादायक चित्र समोर आले आहे. तालुक्याचे ठिकाण असलेल्या कुरखेड्यात, थेट ग्रामीण रुग्णालय आणि स्टेट बँकेच्या समोर मुख्य रस्त्यावर अवैध दारूविक्री जोमात सुरू आहे. ही दुकाने मिनी बिअर बारचे स्वरूप घेऊन देशी-विदेशी दारू आणि बिअर विकत असून, कोणाचीही भीती न बाळगता ग्राहक तिथेच बसून दारू पितात. स्थानिक पोलिस आणि प्रशासनाचे याकडे दुर्लक्ष असल्याने नागरिकांमध्ये संताप वाढत आहे.
दारूबंदी कायद्याची पायमल्ली : गडचिरोलीत दारूच्या व्यसनामुळे अनेक कुटुंबे उद्ध्वस्त झाली, तर काहींनी जीव गमावला. यामुळे समाजसेवक आणि सामाजिक संघटनांच्या आंदोलनानंतर शासनाने जिल्ह्यात दारूबंदी लागू केली. मात्र, हा कायदा प्रत्यक्षात नावापुरताच राहिला आहे. कुरखेड्यासारख्या तालुक्याच्या मुख्य ठिकाणी खुलेआम दारूविक्री होत असताना पोलिस कारवाई करत नसल्याने स्थानिकांमध्ये नाराजी आहे.
मुक्तीपथ संघटनेची निष्क्रियता? : अवैध दारूविक्री रोखण्यासाठी स्थापन झालेली मुक्तीपथ संघटना गावोगावी प्रबोधन करते आणि मोहफुलाचा सडवा नष्ट करते. मात्र, कुरखेड्यातील मुख्य रस्त्यावर सुरू असलेली दारूविक्री त्यांच्या नजरेतून सुटते की दुर्लक्ष केले जाते, असा प्रश्न नागरिक उपस्थित करत आहेत.
नागरिकांचा संताप : कुरखेडा हे मोठी बाजारपेठ आणि तालुक्याचे केंद्र असल्याने दररोज हजारो नागरिक येथे येतात. ग्रामीण रुग्णालयासमोरच दारूविक्री होत असल्याने रुग्णांचे नातेवाईक आणि बँकेत येणारे ग्राहक त्रस्त आहेत. दारूवर उधळले जाणारे पैसे कुटुंबाच्या गरजा भागवण्याऐवजी वाया जात असल्याने अनेकांचे संसार डबघाईला आले आहेत. स्थानिकांनी या अवैध दारूच्या दुकानांवर तात्काळ कारवाईची मागणी केली आहे.
पोलिसांचा दादालोरा उपक्रम तरीही अपयशी? : पोलिसांनी “दादालोरा खिडकी” उपक्रमातून गृहपयोगी वस्तूंचे वितरण करत सामाजिक कार्याचा दावा केला आहे. मात्र, मुख्य रस्त्यावर सुरू असलेल्या अवैध दारूविक्रीवर कारवाई न होणे हे प्रशासनाच्या निष्क्रियतेचे द्योतक आहे.
नागरिकांची मागणी: कुरखेड्यातील अवैध दारूविक्री बंद करून दारूबंदी कायद्याची कठोर अंमलबजावणी व्हावी, अशी मागणी जोर धरत आहे. पोलिस आणि मुक्तीपथ संघटनेने समन्वयाने कारवाई करावी, तसेच स्थानिकांनी एकत्र येऊन प्रशासनावर दबाव आणावा, असे आवाहन होत आहे.
“या धक्कादायक परिस्थितीमुळे कुरखेड्यातील अवैध दारूविक्री हा चर्चेचा विषय बनला असून, प्रशासन कधी जागे होणार, हा प्रश्न अनुत्तरित आहे!”
About The Author
