आम आदमी पार्टीच्या दणक्याने कुरखेडा प्रशासन जागे: रस्त्यावरील घाण आणि अडथळ्यांविरुद्ध नोटीसा!
“नागरिक आणि आपच्या एकजुटीने कुरखेडा स्वच्छ होणार: प्रशासनाची कारवाई सुरू!”
कुरखेडा, 22 जुलै : कुरखेडा येथील गावांतर्गत रस्त्यांवर जनावरे बांधून पसरलेली घाण, दुर्गंधी आणि वाहने उभी करून निर्माण होणारा वाहतूक अडथळा याविरुद्ध आम आदमी पार्टी, जिल्हा गडचिरोली यांच्या आक्रमक पवित्र्यामुळे नगर पंचायत कुरखेडा प्रशासनाला जाग आली आहे. पक्षाचे जिल्हा अध्यक्ष श्री. नसीर हाशमी यांच्या नेतृत्वाखाली सादर केलेल्या तीव्र निवेदनाच्या (आवक क्र. 756/25, दि. 21.07.2025) दबावानंतर प्रभारी मुख्याधिकारी श्री. राजकुमार धनबाते यांनी दोषींना कायदेशीर नोटीसा जारी केल्या आहेत. मौका तपासणीत असे आढळले की, काही व्यक्तींनी रस्त्यांवर गायी, म्हशी, बैल यांसारखी जनावरे बांधून घाण आणि दुर्गंधी पसरवली आहे. यामुळे शालेय विद्यार्थ्यांसह नागरिकांचे आरोग्य धोक्यात आले आहे आणि वाहतूक अडथळ्यामुळे अपघातांचा धोका वाढला आहे.
कायदेशीर तरतुदी:
– महाराष्ट्र नगर परिषद, नगर पंचायती आणि औद्योगिक नगरी अधिनियम, 1965 : – कलम 291(1)(एक): पहिल्या अपराधासाठी ₹3000/- दंड आणि/किंवा 6 महिन्यांपर्यंत कैद.
– कलम 291(2): दुसऱ्या अपराधासाठी ₹5000/- दंड आणि/किंवा कैद. – कलम 292(अ)(ब): रस्त्यावर जनावरे बांधण्यासाठी पहिल्या अपराधासाठी ₹1000/- आणि त्यानंतर ₹2000/- दंड.
– भारतीय दंड संहिता, 1860 (कलम 268): सार्वजनिक उपद्रवासाठी कारवाई.
– मोटार वाहन अधिनियम, 1988 (कलम 201): वाहतूक अडथळ्यासाठी दंड.
नोटीसीनुसार, संबंधित व्यक्तींनी तात्काळ जनावरे स्वमालकीच्या जागेत हलवावीत, अन्यथा जनावरे कोंडवाड्यात जमा करून दंड आणि कायदेशीर कारवाई केली जाईल.
आम आदमी पार्टीचा दणका
आम आदमी पार्टीने निवेदनात स्वच्छता मोहीम, दंडात्मक कारवाई आणि नियमित देखरेखीची मागणी केली होती. निवेदनावर हेमंत बदन, साईनाथ कोंडावार, मनीष सहारे, विलास लांडेकर, ईश्वर ठाकूर, सविता चौधरी, मोहसिन पठाण, आरती बागडे, शिल्पा आदे, चेतन मैंद, मधू दखणे, चंदन उईके यांच्यासह अनेक नागरिकांनी स्वाक्षऱ्या केल्या होत्या. निवेदन सादर करताना डॉ. भैयालाल राऊत, आप संघटक ताहीर शेख आणि इतर नागरिक उपस्थित होते. पक्षाने त्वरित कारवाई न झाल्यास आंदोलनाचा इशारा दिला होता, ज्यामुळे प्रशासनाला तात्काळ पावले उचलण्यास भाग पडले.
नगर पंचायतीने स्वच्छता मोहीम राबवण्याचे संकेत दिले असून, रस्त्यांची साफसफाई, कचरा संकलन आणि वकृतीक्त अडथळे दूर करण्यावर भर दिला जाईल. भविष्यात असे प्रकार टाळण्यासाठी कडक निगराणी ठेवली जाईल. याबाबत पोलिस स्टेशन कुरखेडा यांनाही माहिती देण्यात आली आहे.
नागरिकांचा सहभाग आणि अपेक्षा
आम आदमी पार्टीच्या दणक्यामुळे प्रशासन जागे झाले असून, नागरिकांना स्वच्छ आणि सुरक्षित रस्त्यांची आशा आहे. श्री. नसीर हाशमी यांनी सांगितले, “आमच्या तक्रारीमुळे प्रशासनाला कारवाई करावी लागली. पण ही फक्त सुरुवात आहे. स्वच्छता आणि वाहतूक व्यवस्था सुधारण्यासाठी आम्ही सतत पाठपुरावा करू.” पक्षाने नागरिकांना स्वच्छता मोहिमेत सहभागी होण्याचे आवाहन केले.
About The Author
