धान घोटाळा: बावणे निलंबित, तपासाला गती
गडचिरोली, २२ एप्रिल : गडचिरोली जिल्ह्यातील देऊळगाव येथील आदिवासी विविध कार्यकारी सहकारी संस्थेत सुमारे ४ कोटी रुपयांचा धान खरेदी घोटाळा उघडकीस आल्यानंतर या प्रकरणाने जिल्ह्यात खळबळ माजवली होती, उपप्रादेशिक व्यवस्थापक एम.एस. बावणे यांच्यासह १७ जणांवर फसवणुकीचा गुन्हा नोंदवण्यात आला आहे. व्यवस्थापकीय संचालक लीना बनसोड यांनी बावणे यांना २१ एप्रिल रोजी निलंबित केले. निलंबन काळात त्यांचे मुख्यालय नंदूरबार येथे निश्चित करण्यात आले आहे.
या घोटाळ्याचा तपास २०२३–२४ आणि २०२४–२५ या कालावधीतील धान खरेदी व्यवहारांमधून सुरू झाला. तपासात १०,०००क्विंटल धान आणि ३४,६०१ बारदाना (धान साठवणुकीसाठी वापरले जाणारे पोते) कमी आढळले. यामुळे संस्थेचे ३ कोटी ९५ लाखरुपयांचे नुकसान झाल्याचे उघड झाले. १९ एप्रिल रोजी कुरखेडा पोलिस ठाण्यात बावणे, विपणन अधिकारी सी.डी. कासारकर, एच.व्ही. पेंदाम, संस्थेचे अध्यक्ष, सचिव आणि संचालक अशा १७ जणांविरुद्ध फसवणुकीचा गुन्हा नोंदवण्यात आला.
गुन्हा नोंदवताच पोलिसांनी तपासाला गती दिली आणि दोन विपणन अधिकाऱ्यांना ताब्यात घेतले. मात्र, बावणे आणि इतर आरोपी फरार झाले असून, त्यांचा ठावठिकाणा लागलेला नाही. पोलिसांनी विशेष पथके स्थापन करून फरार आरोपींचा शोध सुरू केलाआहे. याशिवाय, संस्थेच्या आर्थिक व्यवहारांची सखोल छाननी सुरू आहे. तपासात आणखी धक्कादायक खुलासे होण्याची शक्यताआहे.
या प्रकरणाने सहकारी संस्थांच्या कारभारावर प्रश्नचिन्ह उपस्थित केले आहे. बावणे यांच्या निलंबनाने संस्थेत खळबळ माजली असली, तरी फरार आरोपींचा शोध आणि तपास पूर्ण होईपर्यंत या घोटाळ्याचे खरे स्वरूप समोर येणे बाकी आहे. स्थानिक नागरिकांमध्येही संतापाची लाट आहे. काही सामाजिक कार्यकर्त्यांनी राजकीय हस्तक्षेपाची भीती व्यक्त केली आहे.
पोलिस तपासातून लवकरच आणखी माहिती समोर येईल, अशी अपेक्षा आहे. सध्या ताब्यात घेतलेल्या अधिकाऱ्यांची चौकशी सुरू आहे. हा घोटाळा गडचिरोलीतील सहकारी संस्थांच्या विश्वासार्हतेवर प्रश्न उपस्थित करणारा आहे. येत्या काळात यावर काय कारवाई होते, याकडे सर्वांचे लक्ष लागले आहे.
About The Author
