आरमोरीत पाणी टंचाईवरून तीव्र आंदोलनाचा इशारा; राष्ट्रवादी काँग्रेसचा नगर परिषदेला आठवड्याचा अल्टिमेटम
आरमोरी, 29 एप्रिल : आरमोरी शहरातील इंदिरानगर डोंगरीसह अनेक भागांत निर्माण झालेल्या तीव्र पाणी टंचाईच्या समस्येने नागरिकांचा संयम सुटला आहे. या प्रश्नावर तात्काळ तोडगा काढावा, अन्यथा तीव्र आंदोलन छेडण्याचा इशारा राष्ट्रवादी काँग्रेस पक्षाने (एनसीपी) नगर परिषद प्रशासनाला दिला आहे. माजी आमदार डॉ. रामकृष्ण मडावी यांच्या नेतृत्वाखाली पक्षाच्या शिष्टमंडळाने 29 एप्रिल रोजी नगर परिषदेला निवेदन सादर करून आठवड्याचा अल्टिमेटम दिला आहे. प्रशासनाच्या उदासीनतेमुळे संतप्त झालेल्या नागरिकांनी आंदोलनाची तयारी सुरू केली आहे.
इंदिरानगर डोंगरी परिसरात सुमारे दीड ते दोन हजार लोकवस्ती आहे. या भागातील नळयोजना पूर्णपणे निकामी झाली असून, सौरपंपाद्वारे चालणारी पाणीपुरवठा योजना दिवसाला केवळ अर्धा तासही पाणीपुरवठा करू शकत नाही. बोरवेलवरील हातपंप बंद पडले आहेत, तर नगर परिषदेकडून टँकरद्वारेही पाणीपुरवठा होत नाही. यामुळे रहिवाशांना पाण्यासाठी वणवण भटकावे लागत आहे. विशेषत: उन्हाळ्याच्या काळात ही समस्या अधिक गंभीर बनली आहे. प्रशासनाच्या निष्क्रियतेमुळे नागरिकांमध्ये तीव्र असंतोष पसरला आहे. “आम्ही दररोज पाण्यासाठी भटकतोय. प्रशासनाला आमच्या समस्यांची जाणीवच नाही. आता आंदोलनाशिवाय पर्याय नाही,” अशी संतप्त प्रतिक्रिया इंदिरानगर डोंगरीतील रहिवासी शुभांगी दुमाने यांनी व्यक्त केली.
निवेदन सादर करताना राष्ट्रवादी काँग्रेसचे तालुका कार्याध्यक्ष सुनील नंदनवार, शहर अध्यक्ष प्रदीप हजारे, माजी जिल्हा नियोजन समिती सदस्या कल्पना तिजारे, राष्ट्रवादी महिला काँग्रेसच्या जिल्हा कार्याध्यक्षा रुषाली भोयर, तसेच संगीता मेश्राम, प्रफुल राचमलवार, राकेश बेहरे, प्रवीण पोटेकर, शुभांगी गराडे, भूमिका बागडे, ललिता भोयर, निर्मला कांबळे, ज्योती चौके, सुनीता शिवूरकर यांच्यासह अनेक पदाधिकारी आणि नागरिक उपस्थित होते. शिष्टमंडळाने प्रशासनाला आठवड्याभरात ठोस उपाययोजना करण्याची मागणी केली. यावेळी नगर परिषदेच्या मुख्याधिकारी माधुरी सलामे, प्रशासन अधिकारी प्रितेश काटेखाये आणि पाणीपुरवठा अधिकारी प्रणाली दूधबळे यांनी समस्येचे निराकरण आठवड्याभरात करण्याचे आश्वासन दिले. मात्र, यापूर्वीच्या आश्वासनांवर प्रशासनाने कोणतीही कार्यवाही न केल्याने नागरिकांमध्ये अविश्वासाचे वातावरण आहे.
राष्ट्रवादी काँग्रेसने स्पष्ट केले की, जर आठवड्याभरात पाणीपुरवठा सुरळीत झाला नाही, तर नगर परिषदेविरोधात तीव्र आंदोलन छेडले जाईल. या इशाऱ्यामुळे आरमोरीतील राजकीय आणि सामाजिक वातावरण तणावपूर्ण बनले आहे. प्रशासनावर मोठा दबाव निर्माण झाला असून, आगामी काळात पाणी टंचाईच्या समस्येवर कोणत्या उपाययोजना केल्या जातात, याकडे सर्वांचे लक्ष लागले आहे. नागरिकांच्या संतापाचा उद्रेक आणि आंदोलनाची शक्यता यामुळे प्रशासनाला तात्काळ कारवाई करणे अपरिहार्य ठरले आहे.
About The Author
