श्रीराम विद्यालयाचा पुढाकार: १५ मुलींना मोफत सायकल!”
कुरखेडा, ५ मे : महाराष्ट्र दिन आणि कामगार दिनाच्या निमित्ताने श्रीराम विद्यालय, कुरखेडा येथे मानव विकास मिशन अंतर्गत १५ सावित्रीच्या लेकींना मोफत सायकल वाटपाचा उत्साहपूर्ण सोहळा पार पडला. या उपक्रमाने मुलींच्या शिक्षणाच्या मार्गातील अडथळे दूर करत त्यांच्या स्वप्नांना नवी उभारी दिली आहे.
आदिवासी ग्रामीण विकास शिक्षण संस्थेचे कोषाध्यक्ष व शाळा समिती अध्यक्ष वामनराव फाये, माजी सिनेट सदस्य चांगदेव फाये, प्राचार्य नागेश्वर फाये, प्राचार्य देवेंद्र फाये, संस्था सदस्य हुंडीराज फाये आणि शाळा व्यवस्थापन समितीचे सदस्य डोंगरवार यांनी विद्यार्थिनींना सायकलच्या चाव्या सुपूर्द केल्या. शाळेतील शिक्षक, कर्मचारी आणि पालकांनी या सोहळ्याला मोठ्या उत्साहाने उपस्थिती लावली.
“ही सायकल फक्त वाहन नाही, तर आमच्या शिक्षणाच्या स्वप्नांचा प्रवास सुकर करणारा सोबती आहे,” अशी भावना सायकल मिळालेल्या विद्यार्थिनींनी व्यक्त केली. शाळेत येण्याचा मार्ग सुलभ झाल्याने त्यांनी श्रीराम विद्यालय आणि मानव विकास मिशनचे मनापासून आभार मानले.
शिक्षक एस.बी. शिरपूरवार, डी.एम. नाकतोडे, व्ही.व्ही. फाये, प्रा. प्रदीप पाटणकर, प्राध्यापिका अश्विनी फाये यांच्यासह शिक्षक-शिक्षकेतर कर्मचार्‍यांनी कार्यक्रम यशस्वी करण्यासाठी परिश्रम घेतले. हा उपक्रम मुलींच्या सक्षमीकरणाला चालना देणारा ठरला असून, गावातील शिक्षणाच्या प्रगतीत एक नवा अध्याय जोडला आहे.
About The Author
