कुरखेडा येथे ‘समस्त शिवभक्त परिवार’च्या भव्य ३ दिवसीय शिवजन्मोत्सवाने शहर दुमदुमले
“दिंडी, पालखी, मिरवणूक, पावनखिंडी देखावा आणि अफझलखान वध नाटकाने भक्ती-शौर्याचा अनोखा मेळ”
कुरखेडा (गडचिरोली) २३ फेब्रुवारी : छत्रपती शिवाजी महाराजांच्या जयंतीनिमित्त ‘समस्त शिवभक्त परिवार’तर्फे १८ ते २० फेब्रुवारी २०२६ या कालावधीत आयोजित ३ दिवसीय शिवजन्मोत्सव उत्साह, भक्ती आणि शिवमय वातावरणात यशस्वीपणे संपन्न झाला. या भव्य सोहळ्याने संपूर्ण कुरखेडा नगरीत स्वराज्याभिमान आणि शिवरायांच्या विचारांची ज्योत प्रज्वलित केली.
पहिल्या दिवशी बालक-युवकांसाठी वेशभूषा आणि नृत्य स्पर्धा झाल्या. लहान मुलांनी शिवाजी महाराज, जिजाऊ माता, मावळ्यांच्या वेशात केलेली सादरीकरणे पाहून उपस्थित भावूक झाले. ऐतिहासिक गीते आणि देशभक्तीपर नृत्यांनी वातावरण भारावले.
दुसऱ्या दिवशी सकाळी शहरभर भव्य दिंडी व पालखी सोहळा काढला गेला. भगव्य पताकांनी सजलेल्या रस्त्यांवर ढोल-ताशांचा गजर आणि “जय भवानी, जय शिवाजी”च्या घोषणांनी परिसर दुमदुमला. माजी सैनिकांच्या हस्ते भगव्य ध्वजाचे ध्वजारोहण झाले. त्यानंतर भव्य आरती, पाळणा सोहळा आणि पावनखिंडीच्या युद्धावर आधारित थरारक देखावा सादर झाला, ज्याने उपस्थितांना इतिहासात घेऊन गेले.
दुपारी काढलेल्या भव्य शिवरायांच्या मिरवणुकीत धर्मवीर संभाजी महाराजांच्या वीरमरणाचा हृदयस्पर्शी प्रसंग सादर करण्यात आला. या देखाव्याने अनेकांच्या डोळ्यांत अश्रू तरळले.
तिसऱ्या दिवशी “महाराष्ट्राची माऊली” नाटकाचे दमदार सादरीकरण झाले. अफझलखान वधाच्या प्रसंगातील कलाकारांच्या अभिनयाने प्रेक्षक भारावले आणि टाळ्यांचा कडकडाट झाला.
समारोपात हजारो शिवभक्तांसाठी महाप्रसादाचे आयोजन करण्यात आले. ‘समस्त शिवभक्त परिवार’च्या सर्व सदस्यांच्या अथक परिश्रमाने हा तीन दिवसांचा उत्सव यशस्वी झाला. कुरखेड्यात शिवभक्ती, शौर्य आणि एकतेचा अनोखा संगम पाहायला मिळाला.
जय भवानी! जय शिवाजी! 🚩
About The Author
